স্বাস্থ্য-ৰচনা -অসমীয়া মাধ্যমৰ ছাত্ৰ-ছাত্ৰীসকলৰ বাবে

         স্বাস্থ্য-ৰচনা -অসমীয়া  মাধ্যমৰ  ছাত্ৰ-ছাত্ৰীসকলৰ বাবে  

  আৰম্ভণিঃ  স্বাস্থ্যই পৰম ধন’ বুলি এষাৰ প্রবচন আছে। প্রকৃততে মানুহৰ সকলো ধন-সম্পত্তিৰ তুলনাত স্বাস্থ্যই সবাতোকৈ প্রয়োজনীয়। শৰীৰ সুস্থ হৈ থকা অৱস্থাটোকে স্বাস্থ্য বোলা হয়। স্বাস্থ্যই হৈছে সকলো আনন্দৰ উৎস। স্বাস্থ্য আনে দিব পৰা বস্তু নহয়। স্বাস্থ্য ভাল নহ'লে বহু-ধন-সম্পত্তি বা পঢ়া-শুনা থাকিলেও মিছা হৈ পৰে।

         স্বাস্থ্য ভালকৈ ৰখাৰ উপায়ঃ সকলো কামতে নিয়মীয়া হৈ চলাটো স্বাস্থ্য ভালকৈ ৰখাৰ প্রধান উপায়। নিয়মীয়া খাদ্য, নিয়মীয়াকৈ শুই উঠা বা অন্যান্য কাম কৰাটো বৰ দৰকাৰী। স্বাস্থ্য ভালে ৰাখিবলৈ হ'লে মানুহে কিছুমান নিয়ম মানি চলিব লাগিব আৰু সংযমী হ'ব লাগিব। এলাহ কৰি কোনো পৰিশ্ৰম নকৰাটো স্বাস্থ্যৰ কাৰণে ক্ষতিকাৰক। অতি লোভত পৰি বেছিকৈ খোৱা বা অখাদ্য খালে মানুহৰ স্বাস্থ্যৰ অৱনতি ঘটে। তদুপৰি পৰিষ্কাৰ-পৰিচ্ছন্নতা মানি চলা অতি দৰকাৰ। আমি পিন্ধা

কাপোৰ-কানি, খোৱা খাদ্য বা বাচন সমূহ সদায় পৰিষ্কাৰ কৰি লোৱা দৰকাৰ। মুঠতে আমাৰ ঘৰৰ চৌপাশ অনবৰতে পৰিষ্কাৰ-পৰিচ্ছন্ন হৈ থকাটো বাঞ্চনীয়। কিয়নো প্ৰায়বোৰ বেমাৰ-ব্যাধি লেতেৰা-পৰিৱেশৰ বাবেই বিয়পে। সুস্বাস্থ্যৰ বাবে নিয়মিত শাৰীৰিক, মানসিক পৰিশ্ৰমৰ দৰকাৰ। ইয়াৰ বাবে মানুহে খেলা-ধূলা কৰাটো প্রয়োজনীয়। খেলাৰ জৰিয়তে মানুহে উভয় মানসিক আৰু দৈহিকভাৱে লাভৱান হয়। সেয়ে আজৰি সময়ত ছাত্ৰ-ছাত্ৰীসকলে খেলা-ধূলা কৰা ভাল। ইয়াৰ উপৰিও প্রত্যেকব্যক্তিয়ে খাদ্যপ্রাণ যুক্ত খাদ্য আৰু বীজাণুমুক্ত পানী খাব লাগে। খাদ্য আৰু পানী ওপৰত মানুহৰ স্বাস্থ্য বহুখিনি নির্ভৰ কৰে।

            সামৰণিঃ স্বাস্থ্যই আমাক দীর্ঘায়ু কৰে। স্বাস্থ্যই আমাক সুখ আৰু আনন্দ দিয়ে ভাল স্বাস্থ্যৰ অধিকাৰী হ'লে আমাৰ মন ভালে থাকে। স্বাস্থ্যবান মানুহ সকলো কামতে উদ্যমী হয়। স্বাস্থ্যবান লোকসকল জাতীয় সম্পদ। সেয়ে চৰকাৰ আৰু জনসাধাৰণ সকলোৱে জন-স্বাস্থ্য উন্নতিৰ বাবে যত্নবান হোৱা উচিত।